My Podcast Site

ನೆನೆದುದೆಲ್ಲ ನಡೆದು ಬಿಡೆ

August 4, 2010

pbs.jpg

ಪಿ.ಬಿ.ಶ್ರೀನಿವಾಸ್ ಅವರು ಕನ್ನಡದ ಮುಖ್ಯ ಗಾಯಕರಾಗಿದ್ದರೂ ತಮಿಳಲ್ಲಿಯೂ  ಬಹಳಷ್ಟು  ಮಧುರ ಗೀತೆಗಳನ್ನು ಹಾಡಿದ್ದಾರೆ.  ಹಿಂದಿಯಲ್ಲಿ ‘ದಿಲ್ ಏಕ್ ಮಂದಿರ್ ’ ಆಗಿ ಬಂದ ‘ನೆಂಜಿಲ್ ಒರು ಆಲಯಂ’ ಚಿತ್ರದ ನನ್ನ ಅತ್ಯಂತ ಮೆಚ್ಚಿನ ಗೀತೆಗಳಲ್ಲೊಂದಾದ ‘ನಿನೈಪದೆಲ್ಲಾಂ ನಡಂದುವಿಟ್ಟಾಲ್ ’ ನ ಭಾವಾನುವಾದದ ಪ್ರಯತ್ನವೊಂದು ಇಲ್ಲಿದೆ.   ಹಿಂದಿಯಲ್ಲಿ ಈ ಹಾಡು ‘ಯಾದ್ ನ ಜಾಯೆ ಬೀತೆ ದಿನೊಂಕೀ’  ರೂಪದಲ್ಲಿತ್ತು.  ಬಹಳ ವರ್ಷಗಳ ನಂತರ ಈ ಚಿತ್ರ ‘ಕುಂಕುಮ ರಕ್ಷೆ’ ಎಂಬ ಹೆಸರಲ್ಲಿ ಕನ್ನಡದಲ್ಲೂ ಬಂದಿತ್ತು.  ಆದರೆ ಚಿತ್ರವಾಗಲೀ ಹಾಡುಗಳಾಗಲೀ ಅಷ್ಟೇನೂ ಸುದ್ದಿ ಮಾಡಿದಂತಿಲ್ಲ.

ನೆನೆದುದೆಲ್ಲ ನಡೆದು ಬಿಡೆ

ನೆನೆದುದೆಲ್ಲ ನಡೆದು ಬಿಡೆ ವಿಧಿಯೆಂಬುದು ಎಲ್ಲಿ

ನಡೆದುದನೆ ನೆನೆಸಿದೊಡೆ ನೆಮ್ಮದಿಯು ಎಲ್ಲಿ

ಮುಗಿದ ಕತೆ ಇನ್ನಿಹುದೇ ಕಾಲನ ಪುಟಗಳಲಿ

ನಡೆದ ಕತೆ ಅಳಿಯುವುದೇ ಮನುಜನ ಬಾಳಿನಲಿ

ಸಾವಿರ ಬಾಗಿಲ ಹೃದಯ

ಅದು ಸಾವಿರ ಕನಸಿನ ನಿಲಯ

ಯಾರೋ ಬರುವರು ಯಾರೋ ಇರುವರು

ಯಾರಲಿ ಹೇಳಲಿ ಈ ವ್ಯಥೆಯ

ಕನಸೊಂದೇ ಎದೆಯೊಳಿರೇ ಶೋಕವು ಇರದೆಂದೂ

ಒಂದಿರಲು ಒಂದು ಬರೆ ಶಾಂತಿಯು ಸಿಗದೆಂದೂ

ಬಾಳಿನ ಮೂಲವದೆಲ್ಲೋ

ಅದು ಮುಗಿಯುವ ತಾಣವದೆಲ್ಲೋ

ಇದು ತಾ ದಾರಿಯು ಇದು ತಾ ಪಯಣವು

ಎಂದುದನರಿತವರಿಹರೆಲ್ಲೋ

ದಾರಿಯದು ಕವಲೊಡೆಯೆ ಪಯಣವು ಮುಗಿಯುವುದೇ

ಈ ನಿಜವ ಅರಿಯದಿರೆ ಗುರಿಯದು ಸಿಗಲಹುದೇ

ಪಿ ಬಿ ಎಸ್ ಹಾಡಿಗಾಗಿ ಕ್ಲಿಕ್ಕಿಸಿ